Triglizeridoak gorputzean eta elikagaietan gehien agertzen diren gantzen forma kimikoak dira, odol-zirkulazioan barrena zirkulatzen dutenak, eta odol-analisi baten bidez ezagutzen da odolean dagoen triglizeridoen maila. Proba horren nondik norakoak azalduko ditu irakurri eta aztertuko duzun artikuluak. Ondoren, triglizeridoen maila altuegia daukan pertsona baten kasua aztertuko duzu kontsultako elkarrizketan, eta arazoa konpontzeko medikuak emandako aholkuak ezagutzeko aukera izango duzu.
Eskizofrenia gaixotasun mental ezaguna da, baina zehazki zer den eta gaixoek izaten dituzten zailtasunez ezer gutxi dakigu, oro har. Lehen atazan irakurri eta aztertuko duzun artikuluari esker, eskizofreniaren ezaugarriez, arrazoiez eta tratamenduez gehiago jakiteko aukera izango duzu. Bigarren atazan ikusiko duzun bideo-pasartean, ordea, burmuinaren alde fisikoari erreparatuko diozu; horrela, eskizofrenia bezalako gaixotasun mentaletan burmuineko tolesturek izan lezaketen garrantzia aztertuko duzu atazan zehar.
Tiroidea nola ari den funtzionatzen ikusteko, proba bat baino gehiago egin ohi zaizkio gaixoari. Proba horiek zertan diren ezagutuko duzu xehetasun handiz Jabier Agirre medikuaren artikulua irakurrita. Kontsultako elkarrizketan, berriz, tiroideko arazoa daukan pazienteari proba horiek egiteak diagnostikoan nola lagunduko duen azaltzeko moduari erreparatzeko tartea hartuko duzu.
Buruko ilea edertasun-zeinua da, eta horrexegatik, burusoiltasuna sarritan izan ohi da medikuaren kontsultagai. Aurreneko atazan, burusoiltasun-motak zein diren eta horiei aurre hartzeko baliabideak ezagutzeko Jabier Agirrere medikuaren artikulu bat irakurri eta aztertuko duzu. Bigarrenean, tratamendu egokia erabakitzeko gakoak erakusten duen bideoa ikusiko duzu. Hori oinarritzat hartuta, fase desberdinetan dauden bi kasu tratatzeko aholkuak emango dituzu.
Sekuentzia didaktiko honetan gaixotasun neurologikoen errehabilitazioaz arituko zara. Lehenengo atazan Usansolo-Galdakao Ospitaleko Errehabilitazio Neurologikoko Zerbitzuaren jarduna deskribatzen duen erreportajea irakurtzeko eta aztertzeko aukera izango duzu. Kontsultako elkarrizketan, iktusa izan duen gaixoari etxean eskaini beharreko zainketak azalduko dizkio medikuak senide bati pazienteari alta emateko garaian.
Esplorazio neurologikoa hainbat atalek osatzen duten azterketa mediko konplexua da. Irakurriko duzun artikuluari esker, proba diagnostiko hau nola egiten den eta kontuan hartu beharreko faktoreak ezagutuko dituzu. Ondoren, eroriko handia izan duen ume baten kasua aztertuko duzu kontsultako elkarrizketan, esplorazioaren une garrantzitsuei erreparatuz eta azalpenak osatuz.
Hezur-muineko ziztada izango duzu hizpide sekuentzia honetan. Lehenengo atazan azterketa zer-nolakoa den irakurri eta aztertuko duzu. Bigarrenean, haurrari proba egiteko baimenaz eta prozeduraz arituko zara kontsultako elkarrizketan entzundakoa aztertuz.
Garai batean infartuak batez ere gizonezkoei erasaten bazien ere, azken urteotan gero eta gehiago dira istripu kardiobaskular ezagun hau izaten duten emakumeak ere. Zer aldatu da egoera horren desberdina izateko? Sekuentzia didaktiko honetan irakurri eta landuko duzun artikuluan izango duzu faktore nagusien berri. Bestalde, kontsultako elkarrizketan, medikuak arazoak dituen emakume bati emandako azalpenak eta aholkuak ezagutuko dituzu.
Azken urteetan, pazientearen segurtasuna hobetzeko bideak indar handia hartu du, eta lan-eremu nagusietakoa bihurtu da asistentziaren kalitatea hobetzeari dagokionez. Eginkizun horretan inplikatu dira bai nazioarteko erakunde garrantzitsuak, hala nola OME eta Europar Batasuna, bai herrialde garatu guztietako osasun-zerbitzuak ¹. Horren harira, lehen atazan aztertuko duzu zertan ari diren Bilbo Eskualdean, Pazientearen Segurtasunerako taldean. Bigarrenean, OMEk gomendatutako egiaztatze-zerrenda nola gauzatu landuko duzu ebakuntzetan segurtasuna bermatzeko aldean.
Heste suminkorraren sindromea izango duzu hizpide sekuentzia didaktiko honetan. Lehenengo atazan, gaixotasunaren ezaugarriez, diagnostikoaz eta tratamenduez diharduen artikulua irakurri eta aztertuko duzu. Bigarren atazan, zuntz askoko dieta egitearen komenigarritasunaz jakin nahi duen pazienteari medikuak nola argituko dion kezka aztertuko duzu kontsultako elkarrizketan.
Sekuentzia honetan, baldintza hipotetikoei buruz jardungo dugu. Zozketa baten iragarki batetik abiatuta, iraganeko baldintza irrealen inguruan, batik bat, arituko gara. ...[+]
