Elektromiografia izango da unitate didaktiko honen gaia. Proba diagnostiko hau zertarako erabiltzen den eta probari buruzko xehetasun ugari eskainiko dizkizu lehen atazan irakurriko duzun artikuluak. Bigarren atazan, berriz, elektromiografia egiten ari den medikuaren eta pazientearen arteko elkarrizketa aztertuko duzu, probaren gaineko ohiko azalpenak emateko moduari erreparatuz.
Ospitaleko zerbitzuak azaltzen duen informazio-orria aztertuko duzu lehenengo atazan, eta ohiko azalpen laburrak aztertzeko aukera izango duzu. Era berean, bigarren atazan, harrerara hurbiltzen denari horietako argibide baten azalpena egiten entzungo duzu langilea.
Gernu-ihesa, edo txizaren inkontinentzia, gizonezkoei zein emakumezkoei eragiten dien gaixotasuna da. Hala ere, usuagoa da emakumeek arazo hori izatea. Horrela, % 25ek baino gehiagok pairatzen du esfortzuak eragindako gernu-ihesa. Sekuentzia didaktiko honetan arazo honi buruz jardungo duzu. Lehenengo atazan, txizagura nola gertatzen den eta horrekin lotutako patologiak aztertuko dituzu bideo-pasarte bat ikusiz. Bigarren atazan, gernu-ihesa zer den eta horren inguruko xehetasunak landuko dituzu. Azken atazan, berriz, arazoari aurre egiteko Kegel-en ariketak nola egin behar dituen azalduko diozu pazienteari, kontsultako elkarrizketan.
Loaldiko apnea buxatzailearen sindromeaz (LABS) arituko zara ataza-sekuentzia honetan. Lehenengo atazan, gaixotasuna xehetasunez azalduko duen artikulua irakurri eta aztertuko duzu. Bigarrenean, loaldiko apnearen eta zurrunga egitearen arteko desberdintasunari erreparatuko diozu, besteak beste gai horri buruzko bideo-pasartea aztertuta.
Artikulazio eta muskuluetako min izugarriak eragiten ditu artritis erreumatoideak. Gaixoek mina denbora luzez izan ohi dute gaitza diagnostikatu bitartean, eta horrek oztopatu izan du kasu askotan gaixo bakoitzari zuzendutako terapia egokia jartzea. Gaur egun, gaixotasun erreumatiko hau sendatzen ez bada ere, tratamenduen bidez arintzea lortzen da, eta kasu askotan gaixoak gaitzarekin jarraitzen badu ere, ez du ia sintomarik igartzen. Sintomez eta gaitzaren tratamenduez arituko zara nagusiki ataza-sekuentzia honetan. Lehenengo atazan, adituak azaldutako xehetasunak aztertuko dituzu eta artritis erreumatoidearen deskribapen labur bat osatuko duzu. Bigarrenean, berriz, tratamenduan dagoen pertsona baten bloga irakurriz, bere bizipenak ezagutu eta landuko dituzu. Eta hirugarren atazan, terapia biologikoez arituko zara kontsultako elkarrizketan, tratamenduaren berezitasunak aztertuz.
Bihotzaren Munduko Eguna dela-eta, hemen duzu gai horrekin lotutako sekuentzia bat. Gaixotasun kardiobaskularren gorakadaren aurrean prebentzioan eta gaixoen errehabilitazioan eragitea ezinbesteko ikusi du osasun publikoak. Programa hauen gainean arituko zara sekuentzia didaktiko honetan. Lehenengo atazan, programaren xehetasunak ezagutuko dituzu. Eta bigarrenean, gaixoari programaren berri nola eman aztertuko duzu kontsultako elkarrizketan.
Telemedikuntza izango duzu hizpide ataza-sekuentzia honetan. Aurreneko atazan, Koldo Martinezen artikulua irakurri eta aztertuz, teknologiak medikuntzari ekarri dizkion aldaketen inguruko hausnarketak egitera gonbidatuko zaitugu. Bigarrenean, aldiz, telemetria, telemedikuntzaren aplikazioetako bat, ezagutzeko aukera izango duzu kontsultako elkarrizketaren bidez.
Ikuskatzaileetako medikuek egiten duten lana izango duzu hizpide ataza-sekuentzia honetan. Lehenengoan, erreportajea irakurriko duzu eta lanbide honen berezitasunak aztertuko dituzu. Bigarrenean, ikuskatzailearen eta paziente baten arteko elkarrizketa izango dugu aztergai.
Oinetan ager daitezkeen arazoak areagotu egiten dira pertsona diabetikoa denean. Egoera larria izan daiteke, dirudienez, diabetiko guztien % 30ek izango baitu bizitzan oinetako arazoren bat. Ataza-sekuentzia honetan, podologiaren ikuspuntutik nolako atentzioa eskaintzen zaion aztertuko duzu, Eneko Txurruka podologoaren artikulutik abiatuta. Bigarren atazan, aldiz, oinean ultzera duen pertsona diabetiko batekin izandako elkarrizketa izango duzu aztergai.
Sekula ez dira gaur egun bezain ongi zainduak egon mutiko eta neskatoak, eta inoiz baino interes handiagoa dago haurren aurkako tratu txarrak sustraitik erauzteko. Sekuentzia honetan ikuspegi medikotik helduko diozu gaiari. Horrela, lehen atazan, tratu txarrak zer diren argitzeko aukera izango duzu eta ohiko tratu txarren sailkapenari erreparatuko diozu. Bigarrenean, kasu susmagarri baten aurrean historia medikoan zer jaso eta jakinarazpena noiz egin behar diren aztertuko duzu. Azkenik, tratu txarrak jaso dituen haur baten kasua ezagutuko duzu hirugarren atazako kontsultako elkarrizketan. Bertan, pediatraren jokabideaz eta gurasoekin izan duen jarreraz arituko zara.
Sekuentzia honetan, baldintza hipotetikoei buruz jardungo dugu. Zozketa baten iragarki batetik abiatuta, iraganeko baldintza irrealen inguruan, batik bat, arituko gara. ...[+]
