Zentro horietan eskaintzen diren zerbitzuak eta bete nahi dituzten helburuak zein diren jakin nahi izan dugu. Segidan duzun azalpenean zalantza horiek argitzen saiatuko gara.

Erakundea

Donostiako Goyeneche Fundazioa  1950. urtean sortu zen erakunde ongile, pribatu eta irabazi asmorik gabekoa da. Bere helburua adimen urritasuna duten pertsona helduei zerbitzuak eskaintzea da, arreta okupazionalaren bitartez. 40 profesional baino gehiagok egiten dute lan bertan, Gipuzkoan zehar dituen hamaika kokalekuetan.

Gaur egun  hamaika GARAGUNE daude Gipuzkoan:
•    Goienetxe - Donostia, Easo - Donostia, Usandizaga - Donostia, Azpeitia, Arrasate-Mondragón, Irun, Errenteria, Tolosa, Ordizia, Eibar, Legazpi.

Berioko egoitza nagusia. Argazkia: Michelena.

Zentroetako erabiltzaileak

Adimen urritasuna duten pertsonak hartzen dituzte GARAGUNEek. Adin ezberdinetakoak dira eta denak ere Gipuzkoan bizi direnak. Gipuzkoako Foru Aldundiak bideratzen ditu pertsona hauek GARAGUNEetara.
Erabiltzaileetako batzuk beren lanaldia amaitu dutenak dira eta beste batzuk, berriz, etorkizunean lanean hasiko diren pertsonak. Edonola ere, maila ezberdinetako laguntza behar duten pertsonak aurkituko ditugu zentrootan.

Zerbitzu eta helburuak

FGren helburua da bere zentroetara doazen erabiltzaileen emaitza pertsonalak lortzea eta horretarako Bizitzeko Era Ezberdinen Oinarrizko Plana izeneko plana garatu eta martxan jartzen dute. Plan hau aldizka berraztertzen da pertsonaren eta bere ingurunearekin batera.

Erakundearen egitekorik garrantzizkoena pertsonei honako helburuak lortzen laguntzea da:
• Independentzia
• Integrazio sozial eta komunitarioa
• Autonomia
• Osasuna eta seguritatea
• Harremanak

Adimen urritasuna duen pertsona, gizarteko beste edonor bezala, lehenik eta behin, pertsona dela ulertzen dute eta ondorioz, paregabea. Hau dela eta, bertan egiten den lanaren muina pertsona bakoitza indibidualki ezagutzea da, bere gaitasun eta mugekin.

Informazio gehiago,Donostiako Goyenetxe Fundazioaren webgunean.